مظفرآباد: وزیراعظم آزاد کشمیر فیصل ممتاز راٹھور نے کہا ہے کہ مالی مشکلات کے باوجود حکومت نے صرف چھ ماہ میں متوازن اور خسارہ فری بجٹ پیش کیا، جو پوری ریاست کے لیے ایک اہم کامیابی ہے۔
بجٹ اجلاس سے خطاب کرتے ہوئے وزیراعظم نے بجٹ کی منظوری پر کابینہ، حکومتی ارکان اور اپوزیشن کا شکریہ ادا کیا۔ انہوں نے کہا کہ بجٹ عوامی ضروریات اور ریاستی ترقی کو مدنظر رکھتے ہوئے ترتیب دیا گیا ہے، جبکہ بروقت انتخابات کا انعقاد حکومت کی اولین ترجیح رہا۔
فیصل ممتاز راٹھور کا کہنا تھا کہ انہوں نے ریاستی نظام کے استحکام کے لیے مشکل فیصلے کیے کیونکہ جمہوری نظام ہی عوام کے اعتماد کی بنیاد ہوتا ہے۔ انہوں نے کہا کہ حکومت اپنی چھ ماہ کی کارکردگی کی بنیاد پر عوام کے سامنے جائے گی اور ہر قسم کے سیاسی چیلنج کا سامنا کرنے کے لیے تیار ہے۔
انہوں نے اس بات پر زور دیا کہ مسائل کا مستقل حل مذاکرات اور باہمی مشاورت میں ہے، جبکہ تشدد اور تصادم کسی مسئلے کا حل نہیں۔ ان کے مطابق موجودہ اسمبلی کی آئینی مدت کا مکمل ہونا جمہوریت کی مضبوطی کی علامت ہے۔
وزیراعظم نے بتایا کہ حکومت کو ایسے حالات میں ذمہ داری ملی جب عوام کا ریاستی اداروں پر اعتماد کمزور ہو چکا تھا، تاہم محدود وسائل کے باوجود اداروں کی کارکردگی بہتر بنانے اور عوامی اعتماد بحال کرنے کے لیے اقدامات کیے گئے۔
انہوں نے کہا کہ الیکشن کمیشن کے لیے 2 ارب روپے مختص کیے گئے، آمدن اور اخراجات میں توازن برقرار رکھا گیا اور ترقیاتی منصوبوں کے لیے بھی مناسب فنڈز فراہم کیے گئے ہیں۔
اپنے خطاب میں وزیراعظم نے آزادی اظہار رائے کی حمایت کرتے ہوئے کہا کہ ریاستی قوانین اور نظم و ضبط پر کوئی سمجھوتہ نہیں ہوگا، جبکہ سوشل میڈیا پر عوامی نمائندوں کو ہراساں کرنا افسوسناک عمل ہے۔
اس موقع پر انہوں نے کئی ترقیاتی منصوبوں کا اعلان بھی کیا، جن میں کھائی گلہ کو سب ڈویژن، جبکہ چکسواری، پانیولا، کھڑی شریف اور گھڑی دوپٹہ کو تحصیل کا درجہ دینا شامل ہے۔ اس کے علاوہ ایڈہاک ملازمین اور بیلداروں کی مستقلی، مختلف سیاحتی مقامات پر ٹورسٹ ریزورٹس، چکسواری، دھیرکوٹ اور شاردہ میں فائر بریگیڈ اسٹیشن، آٹھمقام، جورا اور کٹن میں ریسکیو سینٹرز، چکسواری میں ٹیکنیکل کالج اور بنگوئین نالہ ماہل پر آر سی سی پل کی تعمیر کا اعلان بھی کیا گیا۔
وزیراعظم نے فاطمہ جناح لیڈی پارک مظفرآباد کا سابقہ نام بحال کرنے اور ڈی ایچ کیو اسپتال آٹھمقام کی گنجائش 60 سے بڑھا کر 100 بستروں تک کرنے کا بھی اعلان کیا۔
انہوں نے اپنے خطاب کے اختتام پر اس عزم کا اظہار کیا کہ تمام مشکلات کے باوجود عوامی خدمت، ترقیاتی عمل اور ریاستی استحکام کے لیے اقدامات جاری رکھے جائیں گے۔