لاہور(پی ایم این)پنجاب حکومت نے میرج ہالز، مارکیز، فارم ہاؤسز اور بڑی فوڈ چینز کی مانیٹرنگ کے لیے خصوصی کیمرے نصب کرنے کا فیصلہ کرلیا، جس کے تحت ہر ٹرانزیکشن کا حساب ہوگا۔
پنجاب حکومت نے ٹیکس چوری اور ٹیکس فراڈ کرنے والوں کے خلاف کریک ڈاؤن کا فیصلہ کرتے ہوئے میرج ہالز، مارکیز، فارم ہاؤسز اور بڑی فوڈ چینز کے گرد گھیرا تنگ کر دیا ہے، جہاں اب ہر ٹرانزیکشن کا مکمل حساب رکھا جائے گا۔
وزیر اعلیٰ پنجاب مریم نواز شریف کی زیر صدارت پنجاب ریونیو کلیکشن سے متعلق ایک اہم اجلاس ہوا، جس میں ٹیکس چوری روکنے کے لیے ان بڑے اداروں میں خصوصی کیمرے نصب کرنے کا فیصلہ کیا گیا ہے۔
اجلاس میں جعلی رسیدیں دینے اور سیلز چھپانے والوں کے خلاف سخت کارروائی کی منظوری دی گئی ہے، جبکہ بڑے ریسٹورنٹس میں کیش کے بجائے ڈیجیٹل پیمنٹ کو لازمی قرار دینے پر بھی سنجیدگی سے غور کیا جا رہا ہے۔
وزیر اعلیٰ مریم نواز کا کہنا تھا کہ "جب دنیا کیش سے ڈیجیٹل ادائیگیوں پر جا سکتی ہے تو پاکستان کیوں نہیں؟”
انہوں نے واضح کیا کہ ٹیکس چوری پر کوئی سمجھوتہ (نو ٹالرنس) نہیں ہوگا، اور جدید ڈیجیٹل سسٹم اور کیمرے اس چوری کو پکڑیں گے۔انہوں نے پی آر اے کو جدید ٹیکنالوجی سے لیس کرنے، عملہ بڑھانے اور ٹیکس وصولی کی رپورٹ ہر ہفتے پیش کرنے کا حکم بھی دیا۔
پنجاب ریونیو اتھارٹی نے بریفنگ کے دوران بتایا پنجاب حکومت نے نئے مالی سال 27-2026 کے لیے 528.5 ارب روپے کا بھاری ریونیو ہدف مقرر کیا ہے ، پنجاب ریونیو کلیکشن میں 38 فیصد کا نمایاں اضافہ ہوا ہے، جس سے وصولی 346 ارب روپے تک پہنچ گئی ہے۔
پی آر اے کا دائرہ کار 10 اضلاع سے بڑھا کر اب 26 اضلاع تک وسیع کر دیا گیا ہے، ٹیکس نیٹ کو مضبوط کرنے کے لیے اتھارٹی میں انٹیلی جنس، ٹیکس پیئر آڈٹ اور لیگل ونگ قائم کیے جا چکے ہیں۔