سرگودھا(پی ایم این)سرگودھا میں 8 سالہ معصوم بچی منتہا زہرہ کے اغوا، مبینہ زیادتی اور قتل کے کیس میں اہم ترین پیش رفت سامنے آئی، جہاں پولیس کی گرفت میں موجود مرکزی ملزم محمد ارسلان نے اپنے گھناؤنے جرم کا باقاعدہ اعتراف کر لیا۔پولیس نے کارروائی کرتے ہوئے کیس کے چاروں ملزمان کو عدالت میں پیش کر دیا ہے۔
آٹھ سالہ معصوم منتہا زہرہ کو اغوا کے بعد مبینہ طور پر زیادتی کا نشانہ بنایا گیا اور بعد میں بیدردی سے قتل کر دیا گیا۔واقعے کی سی سی ٹی وی فوٹیج بھی سامنے آئی ہے، جس میں معصوم بچی کو آخری بار ایک دکان میں داخل ہوتے ہوئے دیکھا گیا تھا، بعد ازاں بچی کی لاش اسی دکان کی تیسری منزل سے برآمد ہوئی تھی۔
واقعے کے بعد سفاک مرکزی ملزم محمد ارسلان موقع سے فرار ہونے میں کامیاب ہو گیا تھا، تاہم پولیس نے جدید ٹیکنالوجی کی مدد سے اسے ٹریس کر کے گرفتار کیا۔دورانِ تفتیش ملزم ارسلان نے مقتولہ منتہا زہرہ کو زیادتی کا نشانہ بنانے اور پھر قتل کرنے کا اعتراف کر لیا ہے۔
دوسری جانب مقتولہ منتہا کی نمازِ جنازہ آہوں اور سسکیوں میں ادا کر دی گئی، جس میں شہریوں کی بڑی تعداد نے شرکت کی، نمازِ جنازہ کے بعد معصوم بچی کو شہر کے مرکزی قبرستان میں سپردِ خاک کر دیا گیا۔