خواتین کو ہراساں کرنا، بلیک میل کرنا یا دھمکانا ناقابلِ برداشت جرم ہے،حنا پرویز بٹ

لاہور(پی ایم این/حامدمحمودمغل)چیئرپرسن پنجاب ویمن پروٹیکشن اتھارٹی حنا پرویز بٹ نےکہاہےکہ خواتین کو ہراساں کرنا، بلیک میل کرنا یا دھمکانا ناقابلِ برداشت جرم ہے۔ انہوں نے پنجاب کی خواتین کو پیغام دیا کہ وہ ایسے عناصر کے سامنے خاموش نہ رہیں، بلکہ کسی بھی قسم کی ہراسگی کی صورت میں فوری طور پر پولیس یا ویمن پروٹیکشن ہیلپ لائن پر اطلاع دیں۔
انہوں نے ہربنس پورہ جعلی پیر والے واقعہ کا سخت نوٹس لیتے ہوئے متاثرہ خاتون سے فوری رابطہ کیا اور انہیں حکومت کی جانب سے مکمل قانونی تعاون اور انصاف کی یقین دہانی کروائی۔
میڈیا سے گفتگو کرتے ہوئے حنا پرویز بٹ کا کہنا تھا کہ پیری فقیری کے نام پر خواتین کے وقار اور عزت سے کھیلنے والے درندے کسی رعایت کے مستحق نہیں ہیں۔ ایسے جعلی پیر معاشرے کا بدنما داغ ہیں، جن کے خلاف سخت ترین قانونی کارروائی یقینی بنائی جائے گی۔