لاہور(پی ایم این/حامد محمود مغل)لاہور پولیس نے گلشن راوی سے موٹرسائیکل چوری کرنیوالی خاتون کو ساتھی سمیت گرفتار کرلیا۔پولیس کا کہنا ہے کہ دونوں ملزمان کو رات گئے شرقپور برج اٹاری کے علاقے سے گرفتار کیا گیا۔ ملزمان گھر کے باہر کھڑی موٹرسائیکلوں کو نشانہ بناتے تھے اور مختلف علاقوں میں چوری کی وارداتوں میں ملوث رہے ہیں۔
پولیس کے مطابق موٹرسائیکل چوری کی واردات کی سی سی ٹی وی فوٹیج بھی منظرِ عام پر آ گئی ہے، جس میں دونوں ملزمان کو واردات کرتے ہوئے واضح طور پر دیکھا جا سکتا ہے۔ فوٹیج میں برقعہ پوش خاتون کو چوری شدہ موٹرسائیکل چلاتے ہوئے بھی دیکھا جا سکتا ہے۔
پولیس کا کہنا ہے کہ ملزمان کو سیف سٹی اور مقامی کیمروں کی مدد سے ٹریس کیا گیا۔ گرفتار ملزمان سے پستول بمعہ گولیاں، نقدی اور چوری شدہ دو موٹرسائیکلیں برآمد کر لی گئی ہیں۔
پولیس نے ملزمان کے خلاف مقدمہ درج کر کے مزید تفتیش شروع کر دی ہے