کراچی(پی ایم این)کاؤنٹر ٹیررازم ڈیپارٹمنٹ سندھ اور وفاقی حساس ادارے نے کراچی میں ایک مشترکہ انٹیلیجنس بیسڈ آپریشن کے دوران بڑی کامیابی حاصل کرتے ہوئے کالعدم تحریک طالبان پاکستان کے ایک انتہائی خطرناک اور تربیت یافتہ خودکش دہشت گرد کو گرفتار کر کے شہر کو بڑی تباہی سے بچا لیا۔
ترجمان سی ٹی ڈی نے بتایا کہ گرفتار دہشت گرد کی شناخت سلمان عرف ابو ہریرہ کے نام سے ہوئی ہے، جو افغانستان سے خودکش حملوں کی خصوصی کمانڈو ٹریننگ حاصل کر چکا ہے۔ .
ترجمان کا کہنا تھا کہ ملزم کے قبضے سے ایک تیار خودکش جیکٹ، شہر کے انتہائی حساس مقامات کے نقشے اور تصاویر برآمد ہوئی۔
ابتدائی تحقیقات کے مطابق، ملزم اپنے ایک اور ساتھی ادریس عرف اسد اللہ کے ہمراہ کراچی پہنچا تھا اور ان کا ابتدائی ہدف ٹارگٹ کلنگ تھا،گرفتار ملزم سلمان، ہلاک ہو جانے والے خطرناک دہشت گرد زعفران عرف ابو ہریرہ کا قریبی ساتھی ہے اور وہ لبرٹی ٹیکسٹائل میں غیر ملکی باشندوں پر ہونے والے حملے میں بھی براہِ راست ملوث رہا ہے۔
ملزم کراچی میں "مولوی مخلص یار” نامی کمانڈر کی ہدایت پر کسی بڑی خودکش کارروائی کی منصوبہ بندی کر رہا تھا۔
سی ٹی ڈی کا کہنا ہے کہ نیٹ ورک کے دیگر خودکش حملہ آوروں کی بھی کراچی آمد متوقع تھی، جس کے پیشِ نظر مشترکہ ٹیموں نے شہر کے مختلف حصوں میں چھاپہ مار کارروائیاں شروع کر دی ہیں۔
گرفتار دہشت گرد کے خلاف تھانہ سی ٹی ڈی میں دہشت گردی اور بارودی مواد ایکٹ کے تحت مقدمات درج کر لیے گئے ہیں، ملزم سےمزید تفتیش جاری ہے جس میں اہم انکشافات اور مزید بڑی گرفتاریوں کی توقع کی جا رہی ہے۔