جدہ(پی ایم این/ویب ڈیسک)پاکستان مسلم لیگ (ن) کے قائد نواز شریف عمرہ ادائیگی اور روضۂ رسولﷺپر حاضری کے بعد پاکستان روانہ ہوگئے۔۔
اپنی روانگی سے قبل نواز شریف نے جدہ میں ن لیگ کے مقامی عہدیداران اور کارکنوں سے ایک اہم ملاقات کی، جس میں پارٹی امور، اوورسیز پاکستانیوں کے مسائل اور تنظیمی معاملات پر تفصیلی تبادلہ خیال کیا گیا۔
ملاقات میں ن لیگ جدہ کے سرکردہ رہنماؤں مسعود احمد پوری، اکرم گجر اور نور محمد آرائیں سمیت دیگر عہدیداران نے شرکت کی۔
اس موقع پر کارکنوں نے نواز شریف کی صحت یابی اور درازیِ عمر کے لیے خصوصی دعا بھی کی۔ ملاقات کے دوران ن لیگ جدہ کے کارکنوں نے آزاد کشمیر میں حالیہ دہشت گردی اور بیرونی مداخلت کے واقعات کی سخت الفاظ میں مذمت کی۔
ملاقات میں نائب وزیراعظم و وزیر خارجہ اسحاق ڈار اور آرمی چیف کی جانب سے خطے میں امن و امان کے قیام اور کشیدگی میں کمی کے لیے کی جانے والی مخلصانہ کوششوں کو زبردست الفاظ میں سراہا گیا۔
قائد مسلم لیگ (ن) نواز شریف نے ملاقات میں اوورسیز پاکستانیوں پر زور دیا کہ وہ ملکی معیشت کی بحالی اور پاکستان میں سرمایہ کاری کے فروغ کے لیے اپنا کلیدی کردار ادا کریں۔
انہوں نے ہدایت کی کہ ن لیگ کے کارکن سعودی سرمایہ کاروں کو پاکستان میں موجود بہترین کاروباری مواقعوں سے آگاہ کریں اور انہیں وہاں سرمایہ کاری کی ترغیب دیں۔
ملاقات میں تمام شرکاء نے پارٹی قیادت کے ساتھ غیر متزلزل وابستگی کا اعادہ کیا اور ملکی ترقی و خوشحالی کے لیے اپنا تن من دھن قربان کرنے کا عزم ظاہر کیا۔