لاہور(پی ایم این/خالد محمود)وزیرخزانہ پنجاب مجتبیٰ شجاع الرحمان نے لاہور میں پری بجٹ راؤنڈ ٹیبل کانفرنس سے خطاب کرتے ہوئے کہاہے کہ این ایف سی میں پنجاب اپنا حق نہیں چھوڑےگا، این ایف سی میں کٹ لگےگا تو اپنے حق کا دفاع کریں گے۔پنجاب حکومت دن رات کام کر رہی ہے، ایسا ادارہ بنانےجارہے ہیں جہاں ایک ہی چھت تلے تمام ٹیکس لیے جائیں گے، زراعت اورصنعت کو فروغ دینے کے لیےکام کر رہے ہیں، صنعتوں کے لیے بہت بڑا پیکج بنا رہے ہیں، تین سال کے دوران اربوں روپے خرچ ہوں گے، ہماری خواہش ہےکہ ٹیکسسزکوکم کیاجائے، کوشش ہے نئے ٹیکس نا لگائیں بلکہ اس میں کمی لائیں۔
انہوں نے کہاکہ ہم بجٹ دے چکے ہیں، اب تیسرا بجٹ دے رہے ہیں، 16 جون کو پنجاب کا بجٹ پیش کیا جائےگا، وزیراعلیٰ مریم نواز کی صحت بہتر ہو رہی ہے، وزیراعلیٰ نے آج سےکام شروع کردیا ہے۔ہمیں سیلاب کا سامنا کرنا پڑا ،27 اضلاع متاثر ہوئے، ایران امریکا جنگ کی وجہ سے معیشت میں خرابی پیدا ہو رہی ہے، ہم نے کفایت شعاری کی مہم شروع کر رکھی ہے، وزیراعلیٰ پنجاب مریم نواز تنخواہ نہیں لیتیں، صوبائی وزرا اور پارلیمانی سیکرٹریز کو بھی تنخواہیں نہیں دی جا رہیں۔پنجاب اپنے 100 بڑے پروگرام چلا رہا ہے، ہمیں وسائل چاہئیں، این ایف سی میں صوبوں کا حق کم ہوگا تو دیکھیں گے، صوبہ اپنے وسائل کسی طرح نہیں دے سکتا۔