لاہور(پی ایم این/ویب ڈیسک)سیف سٹی کے عملے نے لڑکی کو ہراساں کرنے کی شکایت پر جدید ٹیکنالوجی کی بدولت کارروائی کرکے ملزم کو فوری گرفتار کرلیا۔
ہراسانی کی شکار ایک 16 سالہ لڑکی نے سیف سٹی کی نیکسٹ جنریشن سیفٹی ایپ کے (Anonymous Chat) اینونیمس چیٹ فیچر کے ذریعے بتایا تھا کہ ایک لڑکا اسے مسلسل ہراساں اور بلیک میل کر رہا ہے اور بات نہ ماننے کی صورت میں اس کی تصاویر سوشل میڈیا پر شیئر کرنے کی دھمکیاں دے رہا ہے جس کے باعث وہ شدید ذہنی دباؤ کا شکار ہے اور خودکشی کرنا چاہتی ہے۔
سیف سٹی کے ماہرِ نفسیات نے مسلسل کونسلنگ کے بعد لڑکی کا اعتماد بحال کیا اور اسے یقین دلایا کہ اس کی شناخت مکمل طور پر خفیہ رکھی جائے گی۔اعتماد حاصل ہونے پر لڑکی نے اتھارٹی کو ملزم کی تفصیلات فراہم کیں جس پر جدید ٹیکنالوجی کی مدد سے فوری کارروائی کرتے ہوئے ملزم کو گرفتار کر لیا گیا، عملے کی جانب سے متاثرہ لڑکی کو ہر ممکن قانونی اور نفسیاتی معاونت بھی فراہم کی گئی ہے۔