لاہور(پی ایم این/اکرام بیگ)پاکستان کیمیکل مینوفیکچررز ایسوسی ایشن نےاعلان کیا ہے کہ پاکستان کیمیکل ایکسپو 5 اور 6 جون 2026 کو لاہور ایکسپو سینٹر میں ہوگی۔ یہ اہم ایونٹ پاکستان کی کیمیکل انڈسٹری کی صلاحیتوں کو اجاگر کرے گا، جو معاشی ترقی، صنعتی جدت اور عالمی منڈیوں سے روابط کے لیے ایک اہم شعبہ ہے۔
لاہور چیمبر میں ایکسپو کے حوالے سےپریس کانفرنس سے خطاب کرتے ہوئے لاہور چیمبر آف کامرس اینڈ انڈسٹری کے صدر فہیم الرحمٰن سہگل، چیئرمین پی سی ایم اے ہارون علی خان اور چیئرمین ایکسپو کمیٹی انس محمود، ابرار احمدنے کہا کہ پاکستان میں 5 ارب امریکی ڈالر تک درآمدی متبادل اور 2 ارب ڈالر سے زائد اضافی برآمدات کی صلاحیت موجود ہے، جو آئندہ پانچ سالوں میں جدید سرمایہ کاری، ٹیکنالوجی کی منتقلی اور نیپتھا کریکر اور پیٹرو کیمیکل کمپلیکس جیسے منصوبے لگانے سے حاصل کی جا سکتی ہے۔
صدر لاہور چیمبر فہیم الرحمٰن سہگل نے کہا کہ کیمیکل انڈسٹری میں پاکستان کی درآمدی انحصار کو کم کرنے اور برآمدات کو بڑھانے کی بھرپور صلاحیت موجود ہے۔انہوں نے کہا کہ اگر اس شعبے میں مؤثر منصوبہ بندی اور سرمایہ کاری کی جائے تو یہ پائیدار معاشی ترقی کا اہم ستون بن سکتا ہے۔ انہوں نے کہا کہ یہ ایکسپو صرف تجارتی نمائش نہیں بلکہ صنعتی خود انحصاری، جدت اور معاشی ترقی کی ایک تحریک ہے۔
چیئرمین پی سی ایم اے ہارون علی خان نے کہا کہ پاکستان کیمیکل ایکسپو پاکستان کو کیمیکل سیکٹر میں ایک مضبوط اور مسابقتی ملک کے طور پر سامنے لانے کے عزم کی عکاسی کرتا ہے۔ انہوں نے کہا کہ یہ ایونٹ نئی شراکت داریوں، صنعتی جدت اور ملکی کیمیکل صنعت کی ترقی میں مدد دے گا۔ انہوں نے مزید بتایا کہ پاکستان کی کیمیکل اور پیٹرو کیمیکل مارکیٹ 14 ارب امریکی ڈالر سے زائد ہے، جبکہ مقامی طلب کا 50 فیصد سے زیادہ حصہ درآمدات سے پورا کیا جاتا ہے، جس کے باعث سالانہ 14 سے 15 ارب ڈالر کی درآمدات ہوتی ہیں۔
چیئرمین ایکسپو کمیٹی انس محمود نے کہا کہ اس ایونٹ کے ذریعے مقامی صنعت کو عالمی مارکیٹوں، جدید ٹیکنالوجی اور بین الاقوامی شراکت داروں تک رسائی حاصل ہوگی۔ انہوں نے کہا کہ یہ ایکسپو کیمیکل سیکٹر کی ترقی میں اہم سنگ میل ثابت ہوگا اور اس میں B2B ملاقاتیں، نمائشیں، تکنیکی سیمینارز، پینل مباحثے اور پالیسی ڈائیلاگ شامل ہوں گے۔
یہ اہم ایونٹ پاکستان کی کیمیکل انڈسٹری کی صلاحیتوں کو اجاگر کرے گا 