اسلام آباد(پی ایم این/ویب ڈیسک) وزیراعظم محمد شہباز شریف نے توانائی کے تحفظ کو ملک کے مستقبل کی مجموعی منصوبہ بندی کا ایک اہم حصہ قرار دیا ہے۔
انہوں نے توانائی کے تحفظ کے حوالے سے اسلام آباد میں ایک اجلاس سے خطاب کرتے ہوئے کہا کہ موجودہ علاقائی صورتحال میں توانائی کے تحفظ اور بروقت اقدامات نے توانائی کا بحران پیدا نہیں ہونے دیا ۔
شہباز شریف نے کہا کہ مستقبل کی توانائی کی ضروریات کے پیش نظر ملک میں خام تیل کے سٹریٹجک ذخائر برقرار رکھنے کے منصوبے پر کام جاری ہے۔
وزیراعظم نے کہا کہ توانائی کے تحفظ اور پائیدار ترقی کے لئے نقل و حمل کو بتدریج ماحول دوست برقی ذرائع کی طرف منتقل ہونا چاہئے، مستقبل میں سرکاری استعمال کے لیے صرف الیکٹرک بسیں اور موٹر سائیکلیں خریدی جائیں۔
وزیراعظم نے کہا کہ ای وی چارجنگ سٹیشنز کے قیام کے لیے مزید تیزی سے اقدامات کیے جائیں۔
شہباز شریف نے کہا کہ شمسی توانائی سے پیدا ہونے والی اضافی بجلی کو ذخیرہ کرنے کے لیے بیٹریوں کے حصول میں سہولت فراہم کرنے کے لیے حکمت عملی وضع کی جائے۔
اجلاس کو بتایا گیا کہ تیل اور گیس کمپنیوں کی مسلسل کوششوں سے گیس اور تیل کی مقامی پیداوار میں اضافہ ہو رہا ہے۔
اجلاس کو بتایا گیا کہ شمسی توانائی پیدا کرنے والے گھرانوں کو بیٹری سٹوریج لگانے کی ترغیب دی جا رہی ہے۔