اسلام آباد(پی ایم این) وزیرمملکت برائے خزانہ بلال اظہر کیانی نے بجٹ سازی کے جامع اور مشاورتی عمل کیلئے حکومت کے عزم کا اعادہ کیا ہے۔
انہوں نے ان خیالات کا اظہارکراچی میں اوورسیز انویسٹرز چیمبر آف کامرس اینڈ انڈسٹری کی قیادت سے ملاقات کے دوران کیا۔
ملاقات میں مجموعی معاشی صورتحال، آئندہ بجٹ، کاروباری سرگرمیوں کے فروغ، سرمایہ کاری کے ماحول کو بہتر بنانے اور ٹیکس نیٹ کو وسعت دینے کیلئے حکومتی اقدامات پر تبادلہ خیال کیا گیا۔
چیمبرکے نمائندگان نے مختلف تجاویز اور سفارشات پیش کیں، جو پاکستان میں کام کرنے والے غیر ملکی سرمایہ کاروں کے نقطہ نظر کی عکاسی کرتی ہیں۔
وزیرمملکت نے چیمبر کی کوششوں کو سراہتے ہوئے کاروباری ماحول کو مضبوط بنانے اور سرمایہ کاری پر مبنی ترقی کے فروغ کیلئے شراکت داروں کے ساتھ مسلسل رابطے کی اہمیت پر زور دیا۔