اسلام آباد(پی ایم این)وزیراعظم شہباز شریف نے سعودی عرب کے ساتھ تجارت، سرمایہ کاری اور معاشی ترقی سمیت تمام شعبوں میں تعاون کو مزید وسعت دینے کے پاکستان کے پختہ عزم کا اظہار کیا ہے۔
انہوں نے یہ بات اسلام آباد میں سعودی وزیرِ خزانہ محمد بن عبداللہ الجدعان سے ملاقات کے دوران گفتگو کرتے ہوئے کہی۔
سعودی معزز مہمان کا خیرمقدم کرتے ہوئے وزیراعظم نے خادم حرمین شریفین سلمان بن عبدالعزیز السعود اور ولی عہد محمد بن سلمان بن عبدالعزیز السعود کے لیے نیک تمناؤں کا اظہار کیا۔
وزیراعظم نے کہا کہ پاکستان کے عوام اور حکومت ہمیشہ ہر موقع پر اپنے سعودی بھائی بہنوں کے شانہ بشانہ کھڑے رہے ہیں، اور یہ مضبوط رشتہ ولی عہد کی قیادت اور سرپرستی میں مزید مستحکم ہوا ہے۔
سعودی وزیرِ خزانہ نے وزیراعظم کا شکریہ ادا کرتے ہوئے اس عزم کا اعادہ کیا کہ سعودی عرب ولی عہد محمد بن سلمان کے وژن کے مطابق پاکستان کے ساتھ دیرینہ اور برادرانہ تعلقات کو مزید مضبوط بنائے گا۔