سینیٹر وقار مہدی کا آپریشن غضب الحق پر پاک فوج کو زبردست خراجِ تحسین
کراچی۔ 27 فروری(پی ایم این):پاکستان پیپلز پارٹی کے سینیٹر وقار مہدی نے آپریشن ’’غضب اللحق ‘‘پر پاک فوج کو زبردست خراجِ تحسین پیش کیا ہے۔جمعہ کو جاری اعلامیہ کے مطابق انہوں نے کہا کہ پاک فوج نے کابل رجیم کی بلااشتعال کارروائی پر جرات مندانہ اور سبق آموز اقدام سے ایک واضح پیغام دیا ہے کہ پاکستان کسی بھی جارحیت یا دشمنانہ عزائم کو ہرگز برداشت نہیں کرے گا۔انہوں نے کہاکہ پاکستان کا ردعمل قومی عزم، خودمختاری کے دفاع اور عوام کے تحفظ کے لیے غیرمتزلزل ارادے کا بھرپور عکاس ہے۔ سینیٹر وقار مہدی نے کہا کہ چیئرمین بلاول بھٹو زرداری کا آپریشن غضب الحق کی حمایت میں بیان قوم کی امنگوں کا آئینہ دار ہے۔انہوں نے کہا کہ پیپلز پارٹی ملکی سالمیت اور سرحدوں کے تحفظ کے لیے اپنی مسلح افواج کے شانہ بشانہ کھڑی ہے۔پاکستان پرامن ملک ہے، مگر اس کی خودمختاری کو چیلنج اور جارحیت کرنے کی ہر کوشش کا متحد ہو کر منہ توڑ جواب دیا جائے گا۔
انہوں نے کہا کہ افغان طالبان کو بھارتی ایما پر تصادم اور تخریب کے بجائے پرامن بقائے باہمی کی راہ اختیار کرنا چاہیے۔انہوں نے کہاکہ گزشتہ مئی میں بہادر پاک افواج نے بھارت کو اپنی بہادری اور جرت کے جوہر دیکھا دیئے ہیں۔انہوں نے کہا کہ بھارت آج بھی پاکستان کی افواج کے ہاتھوں اپنی عبرتناک شکست کا سوگ منا رہا ہے۔نمک حراموں کو دھول چٹانا پاکستانی اچھی طرح جانتے ہیں۔ وقار مہدی نے کہا کہ مشرقی سرحدوں سے لے کر مغربی محاذ تک کھڑے پاک فوج کے بہادر جوانوں کی سلامتی اور کامیابی کے لیے دعا گو ہوں۔پوری قوم اپنی بہادر افواج کے ساتھ متحد اور چٹان کی مانند پاکستان کے دفاع کے لیے کھڑی ہے۔