ا سلام آباد(پی ایم این/ویب ڈیسک)امریکہ میں پاکستان کے سفیر رضوان سعید شیخ نے سیلکٹ یوایس اے پروگرام کے تحت امریکہ کا دورہ کرنے والی معروف پاکستانی کاروباری شخصیات کے اعزاز میں پاکستان ہائوس میں عشائیہ دیا۔
عشائیے میں امریکی محکمہ خارجہ کے اسسٹنٹ سیکرٹری برائے جنوبی و وسطی ایشیا پال کپور، کراچی میں تعینات امریکی قونصل جنرل چارلس گڈمین، اسٹیٹ ڈیپارٹمنٹ اور امریکی وزارتِ تجارت کے اعلی حکام نے شرکت کی۔
سیلکٹ یوایس اے پروگرام کے تحت پاکستان کی نو بڑی کمپنیوں کے سولہ نمائندگان مختلف شعبوں سے تعلق رکھتے ہوئے اس وقت امریکہ کے دورے پر ہیں۔ اس دورے کا مقصد سرمایہ کاری اور معاشی سرگرمیوں کو فروغ دینا ہے۔
اس موقع پر خطاب کرتے ہوئے سفیر پاکستان رضوان سعید شیخ نے کہا کہ پاکستان اور امریکہ کے تاریخی تعلقات کا نیا دور اقتصادی روابط اور طویل المدت معاشی تعاون پر مبنی ہوگا۔ انہوں نے کہا کہ آبادی کے لحاظ سے دنیا کے دو بڑے ممالک کے درمیان تعلقات وقت کی اہم ضرورت ہیں۔
انہوں نے کہا کہ گزشتہ چند برسوں سے پاکستان کی قومی سلامتی پالیسی کا محور جیو اکنامکس ہے۔ ان کا کہنا تھا کہ مشرق وسطی میں حالیہ تنازعے کے دوران کراچی بندرگاہ پر کاروباری سرگرمیوں میں اضافہ پاکستان کی جغرافیائی اور تزویراتی اہمیت کو اجاگر کرتا ہے۔
سفیر پاکستان نے دونوں ملکوں کی کاروباری برادری پر زور دیا کہ وہ پاکستان میں موجود معاشی مواقع اور جغرافیائی اہمیت سے بھرپور فائدہ اٹھائیں۔
اس موقع پر خطاب کرتے ہوئے پال کپور نے کہا کہ ماضی کے اتار چڑھاؤ کے باوجود پاک امریکہ تعلقات ہمیشہ اہم رہے ہیں اور موجودہ دور میں ان کی اہمیت مزید بڑھ گئی ہے۔ انہوں نے کہا کہ دوطرفہ تعلقات میں سلامتی کے ساتھ ساتھ معاشی تعاون کو کلیدی حیثیت حاصل ہے۔
پال کپور نے کہا کہ دونوں ممالک کے درمیان اقتصادی تعاون کے فروغ کے لیے بے شمار مواقع موجود ہیں اور بطور شراکت دار ان مواقع سے فائدہ اٹھانا ہوگا۔
کراچی میں امریکی قونصل جنرل چارلس گڈمین نے اپنے خطاب میں عشائیے کے انعقاد پر سفیر پاکستان کا شکریہ ادا کیا۔ انہوں نے کہا کہ وہ گزشتہ آٹھ ماہ سے پاکستان میں سرمایہ کاری کے مواقع تلاش کرنے اور تجارت بڑھانے کے لیے کوشاں ہیں۔
انہوں نے کہا کہ سیلکٹ یوایس اے پروگرام پاکستانی کاروباری افراد کو امریکی منڈی سے استفادہ کرنے کے مواقع فراہم کرے گا اور یہ دورہ دونوں ممالک کے درمیان بڑھتے ہوئے معاشی تعاون کی واضح مثال ہے۔