اسلام آباد(پی ایم این/ویب ڈیسک)صدر آصف علی زرداری اور وزیراعظم شہباز شریف نے کرہ ارض اور قدرتی وسائل کے تحفظ کے لیے بھرپور کوششوں کی ضرورت پر زور دیا ہے تاکہ آئندہ نسلوں کے لیے صحت بخش ماحول یقینی بنایا جا سکے۔
انہوں نے یہ بات آج منائے جانے والے عالمی یوم ارض کے موقع پر اپنے الگ الگ پیغامات میں کہی۔
صدر نے کہا کہ پاکستان ہمیشہ سے پائیدار ترقی اور ماحولیاتی تحفظ کے اصولوں پر کاربند ہے۔انہوں نے ہر شہری، کمیونٹی اور ادارے پر زور دیا کہ وہ اس سلسلے میں اپنا کردار ادا کریں۔
انہوں نے زیادہ سے زیادہ درخت لگانے، پلاسٹک کا استعمال کم کرنے، پائیدار طریقے اپنانے اور نوجوانوں کو ماحولیاتی تحفظ کی اہمیت سے آگاہ کرنے کے مشترکہ عزم پر بھی زور دیا۔ انہوں نے کہا کہ صاف ستھرا اور سرسبز پاکستان ایک اہم ضرورت اور آئندہ نسلوں کے لئے ہم پر قرض ہے۔
وزیر اعظم شہباز شریف نے کہا کہ پاکستان موسمیاتی تبدیلیوں سے سب سے زیادہ متاثرہ ممالک میں شامل ہے جس سے زمین کی قدرتی خصوصیات کے تحفظ کے عزم کو مزید تقویت ملتی ہے۔ انہوں نے کہا کہ بڑھتی ہوئی ماحولیاتی شدت اور غیر معمولی تغیرات ماحولیاتی تبدیلی کے واضح عوامل ہیں۔
شہباز شریف نے کہا کہ حکومت پاکستان قدرتی وسائل، پودوں اور ماحولیات کے تحفظ اور قابل تجدید توانائی کے فروغ سمیت ماحولیاتی تبدیلیوں سے نمٹنے کے لیے کوشاں ہے۔