وزیراعظم، سعودی ولی عہد کا خطے میں امن و استحکام کیلئے مل کر کام کرنے پر اتفاق
March 13, 2026
اسلام آباد(پی ایم این):وزیراعظم محمد شہبازشریف نے جدہ میں سعودی ولی عہد اور وزیراعظم محمد بن سلمان سے ملاقات کی۔
دونوں رہنماؤں نے علاقائی صورتحال پر تبادلہ خیال کیا اور دوطرفہ تعلقات مستحکم بنانے اور خطے میں امن و استحکام کے فروغ کے اپنے عزم کا اعادہ کیا۔
نائب وزیراعظم اور وزیر خارجہ اسحاق ڈار اور بری فوج کے سربراہ اور چیف آف ڈیفنس فورسز سید عاصم منیر بھی ملاقات میں موجود تھے۔
وزیراعظم شہبازشریف نے خادم حرمین شریفین شاہ سلمان بن عبدالعزیز السعود کے لئے عقیدت و احترام کے جذبا ت اور نیک تمناؤں کا اظہار کیا اور پاکستان کے ساتھ سعودی عرب کے دیرینہ تعاون کو سراہا۔
وزیراعظم نے دونوں ملکوں کے درمیان مضبوط دوستانہ تعلقات پر زوردیتے ہوئے سعودی عرب کے ساتھ پاکستان کی مکمل یکجہتی کا اعادہ کیا۔
ملاقات کے دوران دونوں رہنماؤں نے حالیہ علاقائی تبدیلیوں پر تفصیلی تبادلہ خیال کیا اور خطے میں امن و استحکام کے فروغ کیلئے مل کر کام کرنے پر اتفاق کیا۔
وزیراعظم شہبازشریف نے سعودی ولی عہد کو یقین دہانی کرائی کہ پاکستان سعودی عرب کے شانہ بشانہ کھڑا رہے گا اور دونوں ملک علاقائی امن و استحکام کے مشترکہ ہدف کے حصول کیلئے ملکر کام جاری رکھیں گے۔