ا سلام آباد(پی ایم این/ویب ڈیسک)وزیراعظم محمد شہباز شریف نے یورپی یونین کے وفد کو یقین دلایا ہے کہ یورپی یونین کے ساتھ تجارت اور سرمایہ کاری کے فروغ کیلئے کوششیں جاری رکھی جائیں گی۔
انہوں نے یہ یقین دہانی یورپی یونین کے سینئر حکام اور ممتاز یورپی کمپنیوں کے کاروباری نمائندوں کے وفد سے ملاقات میں کرائی، جس نے آج اسلام آباد میں ان سے ملاقات کی۔
یہ وفد ای یوـپاکستان بزنس فورم میں شرکت کیلئے پاکستان کا دورہ کر رہا ہے۔
وزیراعظم نے یورپی یونین کے وفد کا پاکستان میں خیرمقدم کیا اور یورپی یونین اور پاکستان بزنس فورم میں شرکت پر ان کا شکریہ ادا کیا۔
انہوں نے یورپی یونین کے وفد کو مشرق وسطیٰ کی صورتحال کی وجہ سے تیل کی قیمتوں میں حالیہ اضافے سمیت علاقائی چیلنجز کے باوجود معیشت کے استحکام کیلئے کوششیں جاری رکھنے کیلئے حکومت پاکستان کے پختہ عزم کا یقین دلایا۔
یورپی وفد نے یورپی یونین پاکستان بزنس فورم کی میزبانی میں مکمل تعاون فراہم کرنے پر حکومت کو بھرپور انداز میں سراہا۔