وفاقی حکومت کی توانائی کی عالمی منڈیوں پر گہری نظر ہے، وزیرخزانہ
March 08, 2026
اسلام آباد(پی ایم این):وزیر خزانہ محمد اورنگزیب اور وزیر پیٹرولیم علی پرویز ملک نے آج کراچی میں وزیراعلی سندھ سید مراد علی شاہ سے ملاقات کی۔
انہوں نے ملک میں ایندھن کی فراہمی کی صورتحال اور علاقائی صورتحال کی وجہ سے تیل کی عالمی قیمتوں میں اضافے پر تبادلہ خیال کیا۔
اجلاس کے دوران ایندھن کی بچت کے ہنگامی اقدامات اور ملک بھر میں پیٹرولیم مصنوعات کی دستیابی یقینی بنانے پرغورکیاگیا۔
وزیراعلیٰ نے اس موقع پر گفتگو کرتے ہوئے کہا کہ قومی معیشت کے پہیے کو رواں دواں رکھنا حکومت کی ترجیح ہے۔
وزیر خزانہ محمد اورنگزیب نے کہا کہ وفاقی حکومت کی توانائی کی عالمی منڈیوں پر گہری نظر ہے اور وہ تیل کی بڑھتی ہوئی قیمتوں کے مالی اثرات سے نمٹنے کیلئے متبادل منصوبے تیار کر رہی ہے۔
انہوں نے کہا کہ اگر قیمتیں بڑھتی رہیں تو ملک کے تیل کے ماہانہ درآمدی بل میں تقریباً ساٹھ کروڑڈالر کا اضافہ ہو سکتا ہے۔
وزیر پیٹرولیم علی پرویز ملک نے بتایا کہ تیل کی تین کھیپ کل پاکستان پہنچیں گی۔
انہوں نے کہا کہ پیٹرول پمپس پر ایندھن کے ذخائر اور ذخیرہ اندوزی کی نگرانی کیلئے صوبوں کے ساتھ مل کر مشترکہ ڈیش بورڈ قائم کیا جائے گا۔
اجلاس میں ذخیرہ اندوزی کی روک تھام اور توانائی کی بدلتی ہوئی صورتحال سے نمٹنے کیلئے وفاق اور صوبوں کے درمیان روابط کو بڑھانے پر اتفاق کیا گیا۔
وزیر خزانہ محمد اورنگزیب اور وزیر پٹرولیم علی پرویز ملک نے لاہور میں وزیراعلیٰ پنجاب مریم نواز سے بھی ملاقات کی۔
انہوں نے صوبے میں پیٹرولیم مصنوعات کی طلب ورسد اور دستیاب ذخائرکے بارے میں تبادلہ خیال کیا۔
اجلاس میں علاقائی صورتحال کے پیش نظر پٹرولیم مصنوعات کی طلب اور رسد میں توازن برقرار رکھنے کیلئے ایندھن کے تحفظ کی پالیسی اپنانے پر اتفاق کیا گیا۔
وزیراعلیٰ مریم نواز نے زرعی استعمال کیلئے ڈیزل کی بلاتعطل فراہمی یقینی بنانے کی ضرورت پر زور دیا۔
اجلاس میں پٹرولیم کے ذخائر کی کڑی نگرانی پر بھی اتفاق کیا گیا اور حکام کو پٹرولیم مصنوعات کی ذخیرہ اندوزی کے خلاف سخت کارروائی شروع کرنے کی ہدایت کی۔