ا سلام آباد(پی ایم این/ویب ڈیسک)وزیراعظم محمد شہباز شریف نے کہا ہے کہ پاکستان امریکہ اور ایران کے درمیان امن کے لیے مسلسل سفارتی کوششیں کر رہا ہے۔
انہوں نے یہ بات اسلام آباد میں وفاقی کابینہ کے اجلاس کی صدارت کرتے ہوئے کہی۔
وزیراعظم نے کابینہ کو پاکستان کی سفارتی کوششوں پر اعتماد میں لیا جن کی وجہ سے امریکہ اور ایران کے درمیان اسلام آباد مذاکرات ممکن ہوئے۔
انہوں نے اس سلسلے میں چیف آف ڈیفنس فورسز اور چیف آف آرمی سٹاف فیلڈ مارشل سید عاصم منیر اور نائب وزیراعظم اسحاق ڈار کی کاوشوں کا خاص طور پر ذکر کیا۔
وزیراعظم نے کہا کہ پاکستان معاشی استحکام کے حصول کے بعد ترقی کی راہ پر گامزن تھا تاہم امریکہ ایران جنگ سے حکومت کی دو سال کی کوششیں متاثر ہوئیں۔
انہوں نے تمام چیلنجز سے نمٹنے کیلئے ملکر کام کرنے کا عزم ظاہر کیا۔ شہباز شریف نے کہا کہ کفایت شعاری اور بچت اقدامات پر عملدرآمد جاری ہے۔
انہوں نے کہا کہ گزشتہ ہفتوں کے مقابلے میں ایندھن کی کھپت میں نمایاں کمی آئی ہے۔ وزیراعظم نے ملک میں پیٹرولیم مصنوعات کی دستیابی اور فراہمی پر اطمینان کا اظہار کیا۔
وزیراعظم نے موجودہ صورتحال میں صوبائی محکموں کی جانب سے فراہم کی گئی اعانت کا حوالہ دیتے ہوئے کہا کہ وہ اسے جاری رکھنے کی درخواست کریں گے۔
انہوں نے کہا کہ وفاقی اور صوبائی حکومتوں کی جانب سے عوام سے کیے گئے وعدے پورے کریں گے۔ وزیراعظم نے کہا کہ پاکستان نے ساڑھے تین ارب ڈالر کے دوطرفہ قرض کی ادائیگی کردی ہے۔
انہوں نے اطمینان کا اظہار کرتے ہوئے کہا کہ اس ادائیگی کے باوجود زرمبادلہ کے ذخائر برقرارہیں، انہوں نے پاکستان سے تعاون پر سعودی قیادت کا شکریہ ادا کیا۔