اسلام آباد(پی ایم این) صدر آصف علی زرداری اور وزیراعظم محمد شہباز شریف نے کہا ہے کہ علامہ محمد اقبال نہ صرف ایک عظیم شاعر تھے بلکہ ایک فکری، اخلاقی اور روحانی قوت بھی تھے جنہوں نے امت مسلمہ کو خود آگاہی، آزادی فکر، عزت نفس اور عزم محکم کی راہ دکھائی۔
علامہ اقبال کے 88 ویں یومِ وفات کے موقع پر اپنے علیحدہ علیحدہ پیغامات میں دونوں رہنماؤں نے شاعرمشرق کو خراج عقیدت پیش کیا جن کے کلام نے ایک محکوم قوم کو اعتماد اور ثابت قدمی کی جانب راغب کیا۔
صدر مملکت نے کہا کہ علامہ اقبال کی شاعری انصاف، وقار اور انسانی صلاحیتوں پر مبنی ایک ترقی پسند معاشرے کا نظریہ پیش کرتی ہے۔
وزیراعظم نے کہا کہ اقبال کے افکار آج بھی شدت پسندی، عدم برداشت اور سماجی انتشار سمیت عصری مسائل سے نمٹنے کے لئے رہنمائی فراہم کرتے ہیں۔
شہباز شریف نے نوجوانوں کو علم، ہنر اور جذبہ حب الوطنی سے آراستہ کرنے کے لئے حکومت کے عزم کا اعادہ کیا۔