لاہور: (پی ایم این) کھلاڑیوں کی فٹنس اور طبی سہولیات کو عالمی معیار کے مطابق بنانے کے لیے پاکستان کرکٹ بورڈ نے میڈیکل شعبے میں نئی بھرتیوں کا اعلان کر دیا ہے۔
پی سی بی کی جانب سے جاری اعلامیے کے مطابق مختلف اہم عہدوں پر تقرریاں کی جائیں گی، جن میں سینیئر اسپیشلسٹ فزیوتھراپسٹ، اسپیشلسٹ فزیوتھراپسٹ، سینیئر منیجر کوآرڈینیشن اسپورٹس اینڈ ایکسرسائز میڈیسن اور جونیئر اسپورٹس ڈاکٹرز شامل ہیں۔
بورڈ حکام کا کہنا ہے کہ اس اقدام کا مقصد قومی کرکٹرز کو جدید طبی سہولیات فراہم کرنا، انجریز کی بہتر دیکھ بھال کرنا اور کھلاڑیوں کی مجموعی فٹنس کو مزید مضبوط بنانا ہے تاکہ وہ بین الاقوامی سطح پر بہترین کارکردگی دکھا سکیں۔
پی سی بی نے واضح کیا ہے کہ یہ بھرتیاں اسپورٹس میڈیسن کے شعبے کو مزید مستحکم بنانے کی حکمت عملی کا حصہ ہیں، جس سے کھلاڑیوں کی کارکردگی اور طویل مدتی صحت پر مثبت اثرات مرتب ہوں گے۔
دلچسپی رکھنے والے امیدوار 24 اپریل تک درخواستیں جمع کرا سکتے ہیں۔