وزیر خزانہ کا برآمد پر مبنی شعبوں کی معاونت کے عزم کا اعادہ
April 06, 2026
اسلام آباد(پی ایم این )وزیر خزانہ محمد اورنگزیب نے ویلیو ایڈڈ مصنوعات سازی کے فروغ اور برآمد پر مبنی شعبوں کی معاونت کیلئے حکومت کے عزم کا اعادہ کیا ہے۔
انہوں نے یہ بات الیکٹرک پنکھوں کی صنعت کے نمائندوں کے ایک گروپ کے ساتھ ورچوئل میٹنگ کے دوران کہی۔
وزیر خزانہ نے توانائی کی بچت پر مبنی ٹیکنالوجیز کو فروغ دینے کی اہمیت پر روشنی ڈالتے ہوئے کہا کہ موجودہ اقدامات کے بارے میں آگاہی اور ان پر عمل درآمد مطلوبہ نتائج کے حصول کیلئے ضروری ہوگا۔
محمد اورنگزیب نے اس بات پر زور دیا کہ برآمدات کی پائیدار ترقی مصنوعات سازی کے پیمانے، جامعیت اور پالیسی کے تسلسل پر منحصر ہے۔
انہوں نے کہا کہ صنعتی کارکردگی کو مضبوط بنانے کے لیے اگرچہ ٹیکس ایک اہم عنصر ہے تاہم قرضوں تک رسائی، توانائی کا موثر استعمال اور مارکیٹ کی ترقی بھی یکساں طور پر اہم ہے۔
انہوں نے صنعت اور متعلقہ حکومتی شراکت داروں کے درمیان عملی اور مستقبل پر مبنی تجاویز کو بہتر بنانے کے لیے مسلسل رابطے کی حوصلہ افزائی کی۔