لاہور(پی ایم این) : رواں سال کا پہلا سورج گرہن 17 فروری کو ہوگا، جسے “رِنگ آف فائر” کہا جائے گا۔ اس دوران چاند سورج کو اس طرح چھپائے گا کہ اس کا بیرونی حصہ ایک حلقے کی مانند نظر آئے گا، جو بہت منفرد اور دلکش منظر پیش کرے گا۔
تاہم، یہ “رِنگ آف فائر” پاکستان میں نہیں دکھے گا بلکہ صرف انٹارکٹیکا میں نظر آئے گا۔ جنوبی امریکا اور جنوبی افریقہ کے کچھ حصوں میں جزوی سورج گرہن دیکھا جا سکے گا، لیکن دنیا کے بیشتر حصے اس منظر سے محروم رہیں گے۔
سورج گرہن کا آغاز 17 فروری کو پاکستانی وقت کے مطابق دوپہر 12:01 بجے ہوگا۔ مکمل “رِنگ آف فائر” انٹارکٹیکا میں دکھے گا، جبکہ چلی، ارجنٹینا اور جنوبی افریقہ کے کچھ علاقوں میں جزوی سورج گرہن نظر آئے گا۔
یہ “رِنگ آف فائر” یا annular گرہن اس وقت ہوتا ہے جب چاند زمین سے دور ہو کر سورج اور زمین کے درمیان آتا ہے۔ چونکہ چاند زمین سے دور ہوتا ہے، وہ سورج کو مکمل طور پر نہیں چھپاتا اور یہی وجہ ہے کہ ہمیں “رِنگ آف فائر” کا منظر دیکھنے کو ملتا ہے۔
اگرچہ پاکستان میں یہ گرہن دیکھنا ممکن نہیں ہوگا، مگر Time and Date ویب سائٹ کی لائیو اسٹریم کے ذریعے دنیا بھر کے لوگ اس شاندار منظر کا لطف اٹھا سکتے ہیں۔