لاہور: (پی ایم این) وزیراعلیٰ پنجاب مریم نواز شریف اچانک لبرٹی چوک پہنچ گئیں، جہاں ان کی موجودگی پر بڑی تعداد میں شہری جمع ہو گئے۔ وزیراعلیٰ نے عوام سے خوش دلی سے بات چیت کی، بچوں سے شفقت کا اظہار کیا اور شہریوں کے ساتھ سیلفیاں بھی بنوائیں۔
اس موقع پر وزیراعلیٰ مریم نواز شریف نے سکیورٹی اہلکاروں کو عوام اور اپنے درمیان رکاوٹ بننے سے روک دیا تاکہ شہری بلا جھجھک ملاقات کر سکیں۔ انہوں نے بچوں سے ہاتھ ملایا، ان کے ساتھ وقت گزارا اور والدین سے بھی گفتگو کی۔
وزیراعلیٰ نے پیلی شرٹ میں ملبوس ایک معصوم بچی کو دیکھ کر خوشی کا اظہار کیا اور اس سے مصافحہ کیا۔ ایک ننھے شہری نے خود آگے بڑھ کر وزیراعلیٰ سے ہاتھ ملایا جس پر مریم نواز شریف نے اسے پیار دیا۔ ایک نوجوان اپنے شیر خوار بچے کو گود میں اٹھا کر وزیراعلیٰ کے پاس پہنچا، جس پر انہوں نے بچے کے لیے دعائیں دیں۔
شہریوں نے وزیراعلیٰ سے گفتگو کرتے ہوئے ان کے کام کی تعریف کی اور کہا کہ عوام ان کی کارکردگی سے مطمئن ہیں۔ ایک بچے کو آرمی یونیفارم میں دیکھ کر وزیراعلیٰ نے مسکراتے ہوئے کہا کہ آپ تو فوجی بھائی بنے ہوئے ہیں، اور بچے سے مصافحہ بھی کیا۔
کراچی سے آئے ایک شہری نے وزیراعلیٰ کے اقدامات کو قابلِ تعریف قرار دیتے ہوئے کہا کہ ان کا کام واضح طور پر نظر آتا ہے اور عوام پر مثبت اثر ڈال رہا ہے۔
دورے کے دوران وزیراعلیٰ مریم نواز شریف نے بغیر سیفٹی راڈ موٹرسائیکل چلانے والے شہری کو فوری طور پر حفاظتی راڈ لگوانے کی ہدایت کی۔ انہوں نے کہا کہ سیفٹی راڈ شہریوں کی اپنی حفاظت کے لیے ہے اور مختلف کیمپس پر یہ سہولت مفت فراہم کی جا رہی ہے۔
وزیراعلیٰ کا کہنا تھا کہ حفاظتی اقدامات کا مقصد عوام کی جان و مال کا تحفظ ہے۔ انہوں نے واضح کیا کہ بسنت کے موقع پر موٹرسائیکل چلانے پر پابندی نہیں، تاہم حفاظتی اصولوں کی خلاف ورزی پر کارروائی کی جائے گی۔