ا سلام آباد(پی ایم این/ویب ڈیسک)قومی اسمبلی اجلاس میں وزیر مملکت بلال اظہر کیانی نے وقفہ سوالات کے دوران ایوان کو بتایا کہ نئے پیداواری قواعدو ضوابط کے تحت شمسی توانائی کا استعمال عوام کے لیے پُرکشش ہے۔
وزیر مملکت نے کہا کہ محدود وسائل کے باوجود حکومت نے عوام کو ریلیف دینے کی کوشش کی ہے۔
انہوں نے کہا ایک سو انتیس ارب روپے کا فیول سبسڈی پیکیج صارفین کو مشرق وسطی کے تنازع کی وجہ سے تیل کی بڑھتی ہوئی عالمی قیمتوں سے بچانے کے لیے دیا گیا تھا۔
انہوں نے کہا کہ ایک کروڑ سے زائد خاندانوں کو مالی امداد فراہم کرنے کیلئے رواں مالی سال بے نظیر انکم سپورٹ پروگرام کے لیے سات سو سولہ ارب روپے مختص کیے گئے ۔
ایک توجہ دلاؤ نوٹس کے جواب میں امور داخلہ کے وزیر مملکت طلال چوہدری نے کہا کہ اسلام آباد کے سیکٹر آئی 12 پر ترقیاتی کام تقریباً مکمل ہو چکا ہے اور آئندہ چند ہفتوں میں قبضہ حوالے کرنے کا حتمی مرحلہ شروع کر دیا جائے گا۔
ایوان کا اجلاس اب پیر کی شام پانچ بجے ہو گا۔