ا سلام آباد(پی ایم این/ویب ڈیسک)وزیراعظم نے پاکستان،چین کے درمیان بڑھتے کاروباری تعاون پر اطمینان کا اظہارکیاہے۔
وہ آج (جمعہ) اسلام آباد میں آئی بی آئی بیجنگ یونائیٹڈ ٹیکنالوجی کے صدر اور کنٹرولنگ شیئر ہولڈر چیان شیاؤ جون کی قیادت میں اعلیٰ سطح کے چینی کاروباری وفد سے بات چیت کر رہے تھے۔
وفد کا پاکستان میں خیرمقدم کرتے ہوئے وزیراعظم نے کہا کہ پاکستان اور چین کے درمیان تاریخی تعلقات قائم ہیں اور دونوں ممالک سدابہار تعاون پر مبنی سٹریٹجک شراکت دار ہیں۔
انہوں نے صدر شی جن پنگ کی مدبرانہ قیادت میں چین کی شاندار ترقی کو سراہتے ہوئے کہا کہ وہ رواں ماہ کے آخر میں اپنے دورہ چین کے منتظر ہیں۔
وزیراعظم نے آئی بی آئی گروپ کے پاکستان میں ڈیجیٹل اکانومی ہیڈکوارٹرز قائم کرنے کے فیصلے کو سراہا اور پاکستان ، چین کے درمیان کاروباری سطح پر بڑھتے ہوئے تعاون پر اطمینان کا اظہار کیا۔
انہوں نے کہا کہ یہ امر نہایت حوصلہ افزا ہے کہ آئی بی آئی ڈیجیٹل معیشت میں تعاون، سرمایہ کاری کے فروغ اور صنعتی اشتراک کو فروغ دے گا۔
پاکستانی معیشت پر اعتماد کا اظہار کرتے ہوئے چیان شیاؤ جون نے کہا کہ آئی بی آئی پاکستان کی معیشت میں ڈیجیٹل اصلاحات میں معاونت کا خواہاں ہے۔