ا سلام آباد(پی ایم این/ویب ڈیسک)صدر آصف علی زرداری اور وزیراعظم محمد شہباز شریف نے بلوچستان کے ضلع بارکھان کے علاقے نوشم میں فتنہ الہندوستان کے دہشت گردوں کے خلاف کامیاب کارروائی پر سکیورٹی فورسز کو خراجِ تحسین پیش کیا ہے۔
انہوں نے اپنے الگ الگ پیغامات میں آپریشن کے دوران شہید ہونے والے میجر توصیف احمد بھٹی اور دیگر کو خراجِ عقیدت پیش کیا اور شہداء کے درجات کی بلندی اور ان کے اہل خانہ کیلئے صبر کی دعا کی۔
صدر آصف علی زرداری نے کہا کہ شہداء نے وطنِ عزیز کے امن، سلامتی اور دفاع کیلئے عظیم قربانیاں دی ہیں۔ انہوں نے کہا کہ فتنہ الہندوستان اور ریاست مخالف عناصر کے مذموم عزائم کو ہر قیمت پر ناکام بنایا جائے گا۔
وزیراعظم محمد شہباز شریف نے کہا کہ قوم اپنے شہداء کی عظیم قربانیوں کو کبھی فراموش نہیں کرے گی۔ انہوں نے کہا کہ پوری قوم وطنِ عزیز کے تحفظ کے غیر متزلزل عزم میں بہادر سکیورٹی فورسز کے شانہ بشانہ کھڑی ہے۔