فیصل آباد میں کیمیکل فیکٹری میں بوائلر پھٹنے سے دھماکا، 20افرادجاں بحق ہو گئے

فیصل آباد (پی ایم این ) فیصل آباد میں کیمیکل فیکٹری میں بوائلر پھٹ گیا جس کے نتیجے میں جاں بحق افراد کی تعداد 20 ہو گئی جبکہ متعدد زخمی ہوئے۔ریسکیو حکام کے مطابق فیصل آباد کے علاقے ملک پور میں کیمیکل فیکٹری میں بوائلر پھٹنے سے زور دار دھماکا ہوا، دھماکے کے باعث فیکٹری میں آگ لگ گئی،دھماکے سے فیکٹری اور قریب مکانوں کی چھتیں بھی گر گئیں۔

حکام کا کہنا ہے کہ ریسکیو ٹیمیں امدادی کارروائیوں میں مصروف ہیں،جائے وقوعہ سے ملبہ ہٹایا جا رہا ہے،اب تک 20 افراد کی نعشیں نکالی جا چکی ہیں، جبکہ کئی افراد کے ملبے تلے دبنے ہونے کا خدشہ ہے۔۔

ڈپٹی کمشنر فیصل آباد ندیم ناصر کا کہنا ہے کہ کیمیکل فیکٹری میں بوائلر پھٹنے سے خوفناک حادثہ پیش آیا، حادثے میں کئی افراد کی جان چلی گئی، بوائلر پھٹنے سے قریبی گھروں کو شدید نقصان پہنچا، حادثے کے زخمیوں کو ہسپتال منتقل کر دیا گیا ہے، ریسکیو، سول ڈیفنس اور دیگر ادارے امدادی سرگرمیوں میں مصروف ہیں، فیکٹری مالکان کے خلاف انونی کارروائی کی جائے گی۔