February 09, 2026
اسلام آباد (پی ایم این)وزیر خزانہ محمد اورنگزیب نے کہا ہے کہ پاکستان نے منظم اقتصادی پالیسیوں، ادارہ جاتی اصلاحات اور قرضوں کے فعال انتظام کے ذریعے استحکام کی بحالی میں بامعنی پیش رفت کی ہے۔
انہوں نے یہ بات سعودی عرب اور بین الاقوامی مالیاتی فنڈ کی طرف سے مشترکہ طور پر منعقدہ ALULA کانفرنس برائے ایمرجنگ مارکیٹ اکانومیز 2026 میں ” قرضوں کے منفی اثرات سے نمٹنے”کے موضوع پر ایک اعلیٰ سطح کی گول میز کانفرنس سے خطاب میں کہی۔
وزیر خزانہ نے کہا کہ پاکستان حکومتی قرضوں پر قابو پانے اور بہتر طریقے سے اِن کا انتظام کرنے کی راہ پر گامزن ہے۔
انہوں نے کہا کہ ہماری کوششوں سے گزشتہ تین سالوں میں جی ڈی پی میں قرضوں کا تناسب 74 فیصد سے کم ہو کر 70 فیصدرہ گیا ہے۔
محمد اورنگزیب نے ملکی وسائل کو متحرک کرنے میں پیشرفت پر بھی روشنی ڈالتے ہوئے کہا کہ پاکستان نے جی ڈی پی میں ٹیکس کاتناسب بڑھایا ہے، جو کہ اب ٹیکس اصلاحات، ڈیجیٹائزیشن، اورمختلف اقدامات کی بدولت گزشتہ سالوں کی نسبت سنگل ڈیجٹ سے 12 فیصد کے قریب پہنچ چکا ہے۔