February 08, 2026
اسلام آباد (پی ایم این) وزیرِ خزانہ محمد اورنگزیب نے کہا ہے کہ پاکستان کی محنتی ٹیمیں سعودی عرب کی پاکستان میں سرمایہ کاری کے وعدوں کو حتمی شکل دینے کے عمل میں بھرپورکردارادا کر رہی ہیں۔
انہوں نے یہ بات آج (اتوار) کو سعودی عرب میں ابھرتی ہوئی منڈیوں کی معیشتوں کیلئےAlUla کانفرنس کے موقع پر سعودی عرب کے معیشت و منصوبہ بندی کے وز یر فیصل بن فاضل الابراہیم سے گفتگوکرتے ہوئے کہی۔
وزیرِ خزانہ نے کہا کہ پاکستان سعودی عرب سمیت اہم بین الاقوامی منڈیوں کیلئے اعلیٰ معیار کے انسانی وسائل کی منظم فراہمی کا منصوبہ بنا رہا ہے جس کامقصد دونوں ممالک کیلئے معاشی فوائد حاصل کرناہے۔
وزیرخزانہ نے پاکستان کی معیشت کیلئے سعودی عرب کے مسلسل عزم پر اُس کا شکریہ ادا کیا۔ملاقات کے دوران فریقین نے پاکستان میں سعودی سرمایہ کاری اور دو طرفہ معاشی تعاون سے متعلق امور پر پیشرفت کا جائزہ لیا۔
سعودی وزیر نے پاکستان میں تیار ہونیوالی اعلیٰ معیار کی مصنوعی ذہانت اور ٹیکنالوجی کی صلاحیتوں کوبھرپوراجاگرکرتے ہوئے کہا کہ عالمی سطح پر پاکستان اس شعبے میں پہلے یا دوسرے نمبر پر ہے۔
انہوں نے کہا کہ سعودی عرب ٹیکنالوجی پرمبنی تبدیلی کی قیادت اور معاونت کیلئے پاکستان کی ٹیکنالوجی کی صلاحیت سے فائدہ اٹھانے کا خواہشمند ہے۔
اس تناظر میں انہوں نے امریکی تاجروں اور گوگل کے سابق سی ای او ایرکSchmidt کا حوالہ دیا، جنہوں نے بھی پاکستانی ٹیکنالوجی ماہرین کی صلاحیت اور استعدادکار کو تسلیم کیا ہے۔
سعودی وزیر نے خلیج تعاون کونسل آزادانہ تجارتی معاہدے میں پیشرفت کا بھی ذکر کیا اور پاکستان کے ساتھ تجارت اور تبادلوں میں اضافے کو ترجیح دینے پر زور دیا۔