February 11, 2026
لاہور(پی ایم این):وفاقی تعلیم و پیشہ ورانہ تربیت کے وزیرڈاکٹر خالد مقبول صدیقی نے دورحاضر کے چیلنجوں سے نمٹنے کیلئے نصاب کو تبدیل کرنے کی ضرورت پر زور دیا ہے۔
وہ اسلام آباد میں ’’پاکستان کا نیا قومی نصاب‘‘ کے موضوع پر شروع ہونے والی دوروزہ قومی کانفرنس سے خطاب کر رہے تھے۔
ڈاکٹر خالد مقبول صدیقی نے پاکستان کی ثقافتی اور نظریاتی بنیادوں کے مطابق بدلتے ہوئے عالمی حقائق کے تناظر میں طلباء کو تعلیم و تربیت کی فراہمی کی اہمیت پر زور دیا۔
تقریب سے خطاب کرتے ہوئے منصوبہ بندی و ترقی کے وزیر احسن اقبال نے سوشل میڈیا کے ذمہ دارانہ استعمال کے فروغ کیلئے میڈیا لٹریسی کو نصاب میں شامل کرنے پر زور دیا۔
انہوں نے کہا کہ پاکستان کے دشمن ملک میں افراتفری اور انتشار پھیلانے کیلئے سوشل میڈیا کا استعمال کر رہے ہیں۔
انہوں نے کہا کہ نوجوان نسل کو ذمہ دارانہ اور درست انتخاب کرنے کیلئے تعلیم یافتہ ہونا چاہیے۔
وفاقی وزیر نے تمام شعبوں میں مصنوعی ذہانت کے بڑھتے ہوئے اثرات کا حوالہ دیتے ہوئے بچوں کو عملی اور تجرباتی تعلیم میں مصروف کرنے کی فوری ضرورت پر زور دیا۔