مظفرآباد: وزیراعظم پاکستان شہباز شریف نے آزاد جموں و کشمیر قانون ساز اسمبلی کے اجلاس سے خطاب کرتے ہوئے کہا ہے کہ وہ پاکستان کے عوام اور حکومت کی جانب سے کشمیریوں سے اظہارِ یکجہتی کے لیے آزاد کشمیر آئے ہیں۔ انہوں نے سابق صدر آزاد کشمیر بیرسٹر سلطان محمود چودھری کے انتقال پر گہرے دکھ اور افسوس کا اظہار کیا اور مرحوم کے درجات کی بلندی کے لیے دعا بھی کی گئی۔
وزیراعظم نے کہا کہ تحریک آزادی کشمیر کے تمام قائدین اور کشمیری عوام کو سلام پیش کرتے ہیں۔ ان کا کہنا تھا کہ کشمیری عوام اپنی جان و مال حتیٰ کہ اپنے بچوں تک کی قربانی دے سکتے ہیں مگر حقِ خودارادیت سے دستبردار نہیں ہو سکتے۔ انہوں نے قائداعظم محمد علی جناح کے اس مؤقف کو دہرایا کہ کشمیر پاکستان کی شہ رگ ہے۔
شہباز شریف کا کہنا تھا کہ مسئلہ کشمیر کا پائیدار اور منصفانہ حل صرف اقوام متحدہ کی سلامتی کونسل کی قراردادوں اور کشمیری عوام کی خواہشات کے مطابق ہی ممکن ہے۔ پاکستان کشمیریوں کے حقِ خودارادیت کی حمایت اس کے حصول تک جاری رکھے گا۔ انہوں نے کہا کہ مقبوضہ کشمیر میں عوام کی آواز دبائی نہیں جا سکتی اور قربانیوں کے نتیجے میں آزادی کی منزل قریب ہے۔
وزیراعظم نے معرکہ حق کا حوالہ دیتے ہوئے کہا کہ اللہ کے فضل، قوم کی دعاؤں اور پاک فوج کی پیشہ ورانہ صلاحیتوں کے باعث پاکستان کو فتح نصیب ہوئی، جس سے نہ صرف بھارت کو شکست ہوئی بلکہ مسئلہ کشمیر عالمی سطح پر مزید اجاگر ہوا۔ انہوں نے کہا کہ عسکری اور سفارتی محاذ پر بھارتی بیانیہ ناکام ہوا ہے۔
ان کا کہنا تھا کہ بھارت کی جانب سے خطے میں جارحانہ اور توسیع پسندانہ پالیسیوں کے باعث امن خطرے میں ہے۔ پاکستان امن کا خواہاں ہے لیکن برابری اور انصاف کی بنیاد پر۔ انہوں نے فلسطین اور کشمیر کے عوام کو ان کی مرضی کے مطابق جینے کا حق دینے پر زور دیا۔
وزیراعظم شہباز شریف نے آزاد کشمیر کے لیے متعدد فلاحی و تعلیمی اقدامات کا اعلان کرتے ہوئے کہا کہ مہاجرین کا ماہانہ وظیفہ 3500 روپے سے بڑھا کر 6 ہزار روپے کیا جا رہا ہے۔ مظفرآباد میں دانش یونیورسٹی کا سب کیمپس اور اسلام آباد طرز کا خدمت سینٹر قائم کیا جائے گا۔ اس کے علاوہ رواں سال 2 ہزار 96 کشمیری طلبہ کو لیپ ٹاپ فراہم کیے گئے جبکہ مزید 1700 طلبہ کو لیپ ٹاپ دینے کا اعلان بھی کیا گیا۔
انہوں نے آزاد کشمیر میں اسکولوں کی چھتوں کی تعمیر و مرمت کے لیے ایک ارب روپے کے فنڈز دینے کا بھی اعلان کیا۔
اجلاس سے خطاب کرتے ہوئے وزیراعظم آزاد کشمیر فیصل ممتاز راٹھور نے کہا کہ وزیراعظم شہباز شریف کا قلیل مدت میں تیسرا دورہ کشمیری عوام سے گہری وابستگی کا ثبوت ہے۔ انہوں نے کہا کہ بھارتی افواج کشمیریوں کی سوچ اور جذبے کو دبا نہیں سکتیں۔
اس موقع پر اسپیکر آزاد کشمیر قانون ساز اسمبلی چودھری لطیف اکبر نے کہا کہ تنازعہ کشمیر اقوام متحدہ کا نامکمل ایجنڈا ہے اور بھارت کی جانب سے کشمیر کی خصوصی حیثیت ختم کرنے کے اقدامات ناقابل قبول ہیں۔ انہوں نے کہا کہ کشمیری عوام کے دل پاکستان کے ساتھ دھڑکتے ہیں اور آزادی کا دن دور نہیں۔