لاہور(پی ایم این /ویب ڈیسک)امریکہ نے ایران کو خبردارکیاہےکہ وہ جمعے کو ہونے والے مجوزہ مذاکرات کے مقام اور طریقۂ کار میں تبدیلی سے متعلق ایران کے مطالبات قبول نہیں کرے گا۔ امریکی نیوز ویب سائٹ کے مطابقاس تعطل کے باعث سفارتی راستہ بند ہو سکتا ہے اور اس طرح صدر ڈونلڈ ٹرمپ فوجی کارروائی کا فیصلہ کرنے پر آمادہ ہوسکتے ہیں۔
ایران نے مطالبہ کیا تھا کہ مذاکرات کا مقام عمان منتقل کیا جائے اور انہیں صرف ایران اور امریکا تک محدود رکھا جائے ساتھ ہی بات چیت صرف جوہری معاملات تک محدود رہے اور میزائل پروگرام جیسے دیگر امور زیرِ بحث نہ آئیں۔
امریکی حکام نے مقام کی تبدیلی کی درخواست پر غور کیا لیکن اسے مسترد کرنے کا فیصلہ کیا۔
ویب سائٹ کے مطابق ایک سینیئر امریکی عہدیدار نے کہا کہ ’ہم نے ان سے کہا کہ یا تو یہی ہوگا یا کچھ نہیں ہوگا اور انہوں نے جواب دیا ‘ٹھیک ہے، پھر کچھ نہیں‘۔
اس عہدیدار نے کہا کہ اگر ایران اصل طے شدہ فارمیٹ پر واپس آنے پر آمادہ ہو جائے تو امریکا اسی ہفتے یا اگلے ہفتے ملاقات کے لیے تیار ہے۔
عہدیدار نے مزید کہا کہ ’ہم جلد کسی حقیقی معاہدے تک پہنچنا چاہتے ہیں ورنہ لوگ دوسرے راستوں کی طرف دیکھیں گے‘، جو صدر ٹرمپ کی جانب سے بارہا دی گئی فوجی کارروائی کی دھمکی کی طرف اشارہ تھا۔