مظفرآباد: (پی ایم این) پاک فوج کے شعبہ تعلقات عامہ (آئی ایس پی آر) کے مطابق فیلڈ مارشل سید عاصم منیر نے مظفرآباد کا دورہ کیا جہاں انہوں نے تحریکِ آزادی کشمیر کے شہداء کو بھرپور خراجِ عقیدت پیش کیا۔ فیلڈ مارشل نے شہدائے جموں و کشمیر کی یادگار پر حاضری دی، پھول چڑھائے اور شہداء کی قربانیوں کو سلام پیش کیا۔
آئی ایس پی آر کے مطابق فیلڈ مارشل سید عاصم منیر نے معززینِ علاقہ اور سابق فوجیوں سے ملاقات کی اور مقبوضہ کشمیر کے عوام کے لیے پاکستان کی غیر متزلزل سیاسی، اخلاقی اور سفارتی حمایت کا اعادہ کیا۔
اس موقع پر فیلڈ مارشل نے کہا کہ شہداء کی قربانیاں جرات، عزم اور بے لوث جدوجہد کی روشن مثال ہیں، جنہیں کبھی فراموش نہیں کیا جا سکتا۔ انہوں نے کہا کہ پاکستان اقوام متحدہ کی سلامتی کونسل کی قراردادوں کے مطابق مسئلہ کشمیر کو عالمی سطح پر اجاگر کرتا رہے گا اور کشمیری عوام کی امنگوں کے مطابق آزادی کی صبح جلد طلوع ہوگی۔
فیلڈ مارشل سید عاصم منیر نے مشکل آپریشنل حالات کے باوجود کشمیر میں تعینات افسران اور جوانوں کی پیشہ ورانہ مہارت، بلند حوصلے اور غیر متزلزل وابستگی کو سراہا۔ انہوں نے ہر سطح پر اعلیٰ آپریشنل تیاری اور مؤثر ہم آہنگی برقرار رکھنے کی اہمیت پر زور دیا۔
آئی ایس پی آر کے مطابق فیلڈ مارشل نے اگلے مورچوں کا بھی دورہ کیا اور فرنٹ لائن پر تعینات جوانوں سے ملاقات کی۔ اس موقع پر انہوں نے کہا کہ کسی بھی قسم کی جارحیت کا فوری اور منہ توڑ جواب دیا جائے گا اور مسلح افواج ہر طرح کے خطرات سے نمٹنے کے لیے مکمل طور پر تیار ہیں۔