February 09, 2026
اسلام آباد (پی ایم این) صدر آصف علی زرداری اور وزیراعظم محمد شہباز شریف نے جاپان کی وزیراعظم سائیں تاکائیچی کو ایوان زیریں کے انتخابات میں اُن کی لبرل ڈیموکریٹک پارٹی کی تاریخی کامیابی پر دلی مبارکباد دی ہے۔
صدر آصف علی زرداری نے ایک بیان میں کہا کہ فیصلہ کن انتخابی نتائج سے وزیراعظم سائیں تاکائیچی کی قیادت پر جاپانی عوام کے بھرپور اعتماد اور جاپان کو مضبوط اور خوشحال بنانے کے اُن کے عزم کی عکاسی ہوتی ہے۔
انہوں نے جاپان کے ساتھ دوستانہ تعلقات مزید مستحکم کرنے اور دونوں ممالک کے عوام کے فائدے کیلئے باہمی مفاد کے شعبوں میں تعاون مضبوط کرنے کی پاکستان کی خواہش کا بھی اعادہ کیا۔
وزیراعظم شہباز شریف نے ایکس ہینڈل پر ایک پوسٹ میں کہا کہ پاکستان جاپان کے ساتھ شاندار دوطرفہ تعلقات کو مزید مستحکم اور متنوع بنانے کیلئے وزیراعظم سائیں تاکائیچی کے ساتھ ملکر کام جاری رکھنے کا خواہاں ہے۔