اسلام آباد (پی ایم این)وزیر قانون اعظم نذیر تارڑ نے اسلام آباد میں وزیر اطلاعات کے ساتھ پریس کانفرنس میں کہا کہ اگر ایمرجنسی کا نفاذ سیاسی مقاصد کے لیے ہوتا تو یہ اقدام پہلے بھی کیا جاسکتا تھا، خیبرپختونخوا کی سابقہ حکومت کا دہشت گردی کے خلاف عدم تعاون اور کردار ریکارڈ پر ہے۔
اعظم نذیر تارڑ کا کہنا تھا اگر ترجیح دہشتگردی کے خاتمے کی بجائے سیاسی مفادات کے لیے لوگوں کو متحرک کرنا ہو اور وفاقی اداروں کے ساتھ مل کر دہشتگردی کے خلاف مربوط کوششیں نہ کی جائیں تو یہ افسوسناک ہے۔
ان کا کہنا تھا کہ وزیراعظم نے معاملہ وفاقی کابینہ کے سامنے رکھا، جہاں تمام امور کا جائزہ لینے کے بعد خیبرپختونخوا کے عوام کے تحفظ اور وفاق کو مضبوط بنانے کے لیے آئینی راستے اختیار کرنے کا متفقہ فیصلہ کیا گیا۔